كتاب كتائب أعلام الأخيار من فقهاء مذهب النعمان المختار

الكتيبة الثانية والعشرون - [٨٠٣ - أبو السعود العمادي] - ج: 4 - ص: 477

محبوسلر ايله بر قريه يه كلوب جبر إيله بر اوده قونوب صاحبنه جفا ويروب كيجه محبوسلرك بعض أول اوده مصلوب ياخود مقتول بولنوب ايدن معلوم اولمايجق دِيت كيمه دوشر ديو جوق استفسار اولنور بونك كي يرده إمام أعظم قتنده اول موضع ملك إيسه دِيت مالكنه دوشر وقف إيسه وقف جانبنه دوشر.

أما إمام أبو يوسف قتنده تصرف، تصرف إيدنه دوشر حتى قونق قوندغي اوده مقتول بولنوب قاتل بولونمسه أو مستقلًا قونق ألنده اولوب صاحب بيله ساكن اولمايجق صاحبنه دِيت وقسامه لازم اولمز، بو مقوله لرده ملك صاحبنك ووقف جانبنك علاقه سي اولميوب آخر برده ايكن ديت آنلره تحميل اولنوب إمام أعظم قولي ايله عمل اولنمق متصرف اولنلرك حفظنده تقصير لرينه ومساهله لرينه مؤدى اولوب إمام أبو يوسف قولي ايله عمل اولنوب ديت متصرف اولنده تحميل اولنمق آنلرك حفظ وحراستلرينده زياده اهتماملرينه باعث اولماغيله دفع فساده أنسب كوريلوب عتبئ عليايه عرض اولندي، كتبه أبو السعود الحقير.

بوخصوصده حضرت إمام أبو يوسف قوليله عمل اولنه، بو أمر اولوندي في التاريخ السابق ذكره، وأيضًا بر ذمي فوت اولوب مالي بيت المال أميني النده ضبط اولنوب وارث كلوب وراثتنه ذمي شاهد كتورسه قياسًا مقبول دكلدر استحسانًا مقبولدر، عامه بيت المال النده قضاة ولايت بونكله عمل ايدوب حكم إيدوب حجت دين كلمشدر أمّا طقوز يوز إيلي بر سنه سنده دوبره ونديك ذمتنك تاجر لرندن برنيك خصوصنده بايه سريره عرض اولندقده مسلم شاهد وارميدر تتبع اولنسون ديو فرمان عالي وارد اولمش ايدي. أول أجلدن استحسان ايله عمل اولنمغه إذن ويردكلري حجتلري صحيح ميدر؟ يكتور دكلرنده صحتنه علامت وضع اولونميوب واستفسار اولندقده قطعي جواب ويرلميوب استحسان ايله عمل ايلمكه مأمور اولان حاكم